Banda á Feira nace coa intención de sacar o mundo do cómic ás rúas, máis concretamente ás prazas e espazos do barrio do Calvario en Vigo. Este festival único busca celebrar o amor pola banda deseñada e xerar unha cita anual que aos poucos se vaia coando no calendario dos apaixonados polo que se coñece como a novena arte.

A banda deseñada segue sendo unha das expresións artísticas máis descoñecidas para o gran público. Na actualidade conta cunha diversidade incomparable en canto a xéneros e formatos, abarcando desde o cómic histórico ata o de superheroes, pasando polo terror, a ciencia ficción, a fantasía, o humor e moito máis. Esta riqueza fai que exista un cómic ideal para cada lector e, quen non o coñece, é porque aínda non o atopou.

A filosofía do evento é clara: levar a cultura da banda deseñada a un ambiente popular cheo de vida como é a contorna do mercado do Calvario. Esta iniciativa demostra que o movemento veciñal resulta imprescindible para achegar a cultura á xente alá onde outros estamentos e institucións non conseguen chegar, aos barrios, ao núcleo mesmo da nosa forma de relacionarnos.

Banda á Feira une a paixón polas viñetas coa idea de seguir mantendo vivos os nosos espazos populares, enchéndoos de actividade, arte e cultura.

Ata o momento realizáronse tres edicións de Banda á Feira, entre 2022 e 2024. Cada unha delas celebrada por preto de 5000 persoas que gozaron dunha ampla gama de actividades programadas: sinaturas, charlas cos autores e autoras convidadas, exposicións, obradoiros de cómic para os máis pequenos, e moito máis.

Un dos grandes focos de atracción do festival son os autores e autoras de banda deseñada convidados ao evento. Por Banda á Feira pasaron ata 15 invitados nas tres edicións, incluíndo varios creadores recoñecidos co Premio Nacional de Cómic, o galardón máis importante que se pode recibir no cómic español.

A traxectoria dos invitados do festival é verdadeiramente impresionante. A suma total dános preto de 2000000 de exemplares vendidos e decenas de premios, entre os que figuran o premio Eisner (o máis importante a nivel mundial, tamén chamado «o Óscar do cómic»), o premio Ignatz, o premio Harvey, o mencionado Premio Nacional de Cómic, e numerosos galardóns e distincións a nivel nacional.

O festival ofrece unha variedade de actividades que enriquecen a experiencia dos asistentes. Organizáronse sesións de firmas ás que se sumaron, ademais dos autores convidados, máis de 30 autores e autoras locais, dedicando centos de exemplares. Tamén se impartiron clases maxistrais que esgotaron todas as prazas dispoñibles.

Un aspecto único de Banda á Feira son as charlas a pé de rúa, co mercado do Calvario como vixiante referente. Estas charlas atraen tanto aos máis apaixonados polo medio como a veciños e curiosos, creando unha estampa xenuína e colorida que reflicte a esencia do festival.

O evento tamén apoia aos novos talentos a través de Praza da Banda, un mercado de arte orixinal destinado a mostrar o talento da canteira local. Na súa última edición, Praza da Banda contou con máis dunha vintena de postos nos que se podía comprar arte orixinal directamente aos seus creadores e creadoras.

Ademais, organizáronse obradoiros infantís dirixidos pola escola Kame Cómic, fomentando o interese pola banda deseñada nas novas xeracións.

Banda á Feira tivo unha gran acollida entre os veciños do barrio, que xa o senten como propio, así como entre todos os afeccionados da cidade de Vigo e da provincia de Pontevedra.